Oziq-ovqat mahsulotlari tovarshunosligining
nazariy asoslari

Bugungi kunda mamlakatimiz aholisining oziq-ovqat mahsulotlariga bo‘lgan talabini qondirishga alohida e’tibor qaratilmoqda. Respublikamiz Prezidenti, Hukumatimiz tomonidan keyingi yillarda qishloq xo‘jaligi, xususan sohibkorlikni, bog‘dorchilikni va chorvachilikni rivojlantirish to‘g‘risida qabul qilingan qator qarorlar va farmonlar buning yaqqol namunasidir.
Mustaqilligimiz tufayli Respublikamizda tashkil etilgan yangi mulk shaklidagi korxonalar, firmalar, shuningdek xorijiy mamlakatlar bilan tashkil etilgan qo‘shma korxonalar tomonidan xilma-xil assortimentdagi oziq-ovqat mahsulotlari ishlab chiqarilib va xorijiy mamlakatlardan keltirilib bozorlarimiz to‘ldirilmoqda. Lekin, bu mahsulotlarning kimyoviy tarkibi, sifati, xavfsizligi kabi ko‘rsatkichlari hamma vaqt ham tegishli me’yoriy texnik hujjatlar talabiga javob bermaydi. Bu esa tovarlarning sifatini tekshirishga ilmiy yondashishni va bugungi kun talabi darajasida tovar ekspertizasi o‘tkaza oladigan tovarshunos-ekspert mutaxassislari tayyorlash zaruriyati borligidan dalolat beradi.
Hozirgi kunda O‘zbekiston Respublikasi umumdavlat klassifikatorida Oliy ta’limning bakalavriat yo‘nalishlarida5341400 – «Tovarshunoslik va tovarlarning tijorat ekspertizasi» yo‘nalishi bo‘yicha bakalavrlar tayyorlash va 5A341401 – «Oziq-ovqat mahsulotlari tovarshunosligi va uning ekspertizasi», 5A341402 – «Nooziq-ovqat tovarlari tovarshunosligi va uning ekspertizasi» mutaxassisliklari bo‘yicha magistrlar tayyorlash ko‘zda tutilgan. Ana shu mutaxassislik bo‘yicha magistrlar va bakalavrlar tayyorlash o‘quv rejalarida «Oziq-ovqat mahsulotlari tovarshunosligining nazariy asoslari» fanini o‘qitish rejalashtirilgan.
Mazkur ma’ruzalar matni 5341400 «Tovarshunoslik va tovarlarning tijorat ekspertizasi» yo‘nalishi bakalavriatlariga mo‘ljallab yozilgan bo‘lib, ularning ixtisoslik fanlardan chuqur professional bilimga ega bo‘lishlarida yordam beradi.
Mazkur ma’ruzalar matni davlat tilida birinchi marta yozilayotganligi uchun ba’zi bir nuqsonlardan xoli bo‘lmasligi mumkin. Shu bois muallif ma’ruzalar kursi bo‘yicha o‘z fikr-mulohazalarini bildirgan kishilarga o‘z minnaddorchiligini bildiradi

Saqlab olish